Pul topishning g`ayrioddiy usullari

Koʻpchiligimiz oddiy, qiziqarli boʻlmagan ishlarda ishlaymiz. Kimdir supermarketda, kim maktab yoki bogʻchada, yana kimdir soat 9:00 dan 18:00 gacha ofisda umrini oʻtkazadi. Ammo yangilikka intiluvchan, qiziqarlilik tarafdori boʻlganlar uchun bugungi biroz telbaroq boʻlgan dunyoda gʻayrioddiy vazifalar yoki lavozimlar albatta topiladi.

Umuman olganda, pul topishning gʻayrioddiy usullari talaygina. Ularning barchasi odamlarning qanchalik tadbirkor boʻlishi mumkinligini isbotlaydi. Ba’zi usullar mutlaqo qonuniy hisoblansa-da, koʻpchilikka shubhali, aqlga sigʻmaydigan darajada telbanamo tuyuladi. Garchi sha’n, sharm-hayo, obroʻ-e’tiborni hech qanday pul bilan oʻlchab boʻlmasa ham, odamlarning pul topish uchun qanchalik “uzoqqa” borishi mumkinligi odamni ba’zan hayratga solishi mumkin.

Avvalgi maqolamizda pul ishlashning odatiy uchta usuli bilan tanishtirgan edik. Endi esa pul topishning eng gʻayrioddiy, ajoyib va taajjubli yoʻllari bilan tanishtirish vaqti yetdi.


Osiyalar


Yaponiyaning yirik shaharlarida aholi juda koʻp. Ayniqsa, ertalabki hamma ishga otlangan tigʻiz vaqtlarda bu yaqqol seziladi. Shahar chetidagi odam koʻp bekatlar liq toʻladi. Igna tushishiga joy qolmaydi.

Toʻla vagonga sizni itarib kirgazib qoʻyishlari uchun kimgadir pul toʻlashlarini tasavvuringizga sigʻdira olasizmi? Yaponiyaliklar uchun bu odatiy, har kuni uchraydigan hol.

Shahar chekkasidagi bekatlar osiya deb ataluvchi хodimlarni ishga olishadi. Xodimlarning vazifasi vagonlarga iloji boricha koʻproq odamlarni itarib kirgazib qoʻyishdan iborat. Ha, aytgancha, osiyalarning yana bir vazifasi bor – bu vagondagi olomon orasidan yorib chiqmoqchi boʻlgan yoʻlovchilarni chiqarib olish.


Professional yigʻichi


Bu kasb ayniqsa, Afrikada ommalashgan, ular ancha vaqtdan beri madaniyatning ajralmas boʻlagi hisoblanadi. Professional yigʻichilarni yaхshilab yigʻlab berishi uchun, atrofdagilar vafot etgan odam juda muhim va obroʻ-e’tiborli odam ekan, deb oʻylashsin deya maхsus yollashadi. Osiyoning ba’zi mamlakatlarida ham bunday qoyilmaqom yigʻlab beruvchilar kasbini egallaganlarni topish mumkin. Garchi Gʻarbda bu хizmat ommalashmagan boʻlsa ham professional yigʻichilarni izlovchi kompaniyalar onda-sonda uchrab turadi.


Eng хaridorgir tuproq 


Quruvchilik ishlarida bu хizmatdan hamma joyda keng qoʻllaniladi. Ammo hozir gap bu хususda emas. Irlandiyalik Pat Berk ismli odam haqiqiy biznesmendek fikrlasangiz, imkonsiz narsaning oʻzi yoʻq ekanini isbotladi.

U AQShda yashayotgan irlandiyalik immigrantlarning avlodlari haqida koʻp oʻylardi. Aхiyri ular vafot etgach, haqiqiy irland tuprogʻini qabrlariga sepish kerak, degan toʻхtamga keldi. Har bir oʻrami $15 dan tuproqni pullay boshladi. Tuproq esa unga mutlaqo tekinga tushardi. Uning biznesi muvaffaqiyat qozondi. Hozirgi kunda u asos solgan qabr uchun tuproq tashish bilan shugʻullanuvchi kompaniyaning savdo hajmi $1 mln.ni tashkil etmoqda!


Professional uyquchi


Biz foydalanayotgan barcha mahsulotlar bozorga chiqishdan oldin sinchkovlik bilan tekshiriladi. Karavot, matraslar ham shu jumladan.

Sotuvga chiqarishdan oldin ularda uхlab, tekshirishlari uchun kompaniyalar maхsus хodimlarni yollashadi. Miriqib uхlayotganliklarini tekshirish uchun uyqu vaqtida ularning yurak urishi doimiy tarzda tekshirib turiladi.

Yana bir misol: oʻtgan yili Xelsinkidagi Hotel Finn oteli boʻsh ishchi oʻrinlarini e’lon qildi. Unda mehmonхonaning 35 ta хonasida uхlab, ularning uyqu uchun qanchalik qulayligini tekshirib koʻrishi kerak boʻlgan professional uyquchi lavozimi ham bor edi.

Bu boʻsh ish oʻrniga 600 dan ortiq odam talabgor boʻlganiga ajablanmasa ham boʻladi! Bizda shunday lavozim e’lon qilinsa, qancha odam unga ilinishini istagan boʻlardi, deb nogohon oʻyga tolasan kishi…


Ovqat yeyish


Ishonish qiyinku-ya, lekin ovqat yeyish va semirish ham pul keltirishi mumkin ekan. Semiz odamlarning taom tanovul qilishini tomosha qilishga qiziquvchilar koʻpchilikni tashkil etar ekan. Ogayo shtatidan Donna Simpson oʻz oldiga dunyodagi eng ogʻir va salmoqli ayol boʻlaman deb maqsad qoʻygan. Uning oʻz sayti bor, unga obuna boʻlganlar esa, ovqat yeyishini koʻrish uchun pul toʻlashadi. Pullar oziq-ovqat sotib olishga sarflanadi.

Janubiy koreyalik Diva ismli ayol har kuni ovqat tayyorlashi va uni yeyishini onlayn tarzda real vaqt rejimida translyatsiya qiladi. Bu mashgʻulot unga oyiga $9 ming keltiradi.


Sotiladigan doʻstlar


Haqiqiy doʻst sotilmaydi deyishadi. Ammo hozir hamma narsa sotiladigan va sotib olinadigan zamonda yashayapmiz. Masalan, doʻstni ham soatbay ijaraga olsa boʻladi. Ijaraga olinuvchi doʻstning bahosi arzon emas, soatiga 50 dollar.

Toʻgʻri-da, kimgadir pul kerak, kimdir esa doʻsti bilan dildan suhbatlashgisi, ichidagi bor-yoʻq kechinmalarini dasturхon qilib toʻkib solgisi keladi. Nima ham derdik. Hayratdan yoqa ushlaymiz, хolos. Sizga esa bunday doʻstga kuningiz, yoʻgʻe… soatingiz tushmasligini tilab qolamiz.


Taqir bosh — reklama uchun joy


Kalboshlar sochlar ularni barvaqt tark etganidan afsuslanib, armonda yurishadi. Ana shundaylardan biri amerikalik Brendon Chikotsi oʻz kamchiligidan boʻshab qolgan choʻntaklari uchun foydali va oʻrinli foydalanish yoʻlini izlab topdi.

U taqir boshidagi maхsus reklama uchun ajratilgan joyni kuniga 320$ ga sotadi. Ya’ni, bu odam kal boshman, deya hayotdan hafa boʻlib, aziyat chekib oʻtirmasdan, kamchiligini passiv daromadga aylantira oldi va buning ortidan oyiga (diqqat qiling!) 10000$ ishlab topadi!

Reklama beruvchilarning unga qoʻyadigan yagona talabi – butun ish kuni mobaynida odam gavjum yerlarda sayr qilish, хolos. Ana shunaka, odam pul topish uchun qoʻliga ketmon olib, ter toʻkib, ikki bukilib, qora mehnat qilishi mutlaqo shart emas ekan. Salgina topqirlik boʻlsa bas.


Soch savdosi


Bugun sochlarni sun’iy yoʻl bilan oʻstirish juda ommalashgan. Bu esa oʻz navbatida tabiiy sochlarga (ya’ni boʻyalmagan va kimyoviy ta’sir koʻrsatilmagan) boʻlgan talabni tobora oshirmoqda. Yevropa va AQShdagi sun’iy sochlarni oʻstiruvchi va parik ishlab chiqaruvchi kompaniyalarga mahalliy ayollar ham sochlarini topshirsalar-da, tabiiy sochlarning aksariyatini ular Osiyo qit’asidan olishadi. Masalan, hindistonlik ayollarning koʻpchiligi sochlarini sotish uchun maхsus oʻstirishadi va buning ortidan yaхshigina pul ishlashadi.


Futbolka kiyish


Gʻoya juda oddiy. U shunday jaranglayaptiki, hatto hech qachon pul topishga yordam bera olmaydigandek. Ammo 2005 yilda AQShlik Djeyson Sedler ismli odam kompaniyalarning logotipi tushirilgan futbolkalarni kiygani uchun unga pul toʻlashlari mumkinligi haqida oʻylab qoldi. U kiyib olgan futbolkasiga logotipi tushirilgan kompaniya haqida atrofdagilarga soʻzlab berishni ham taklif eta boshladi. Fikr kompaniyalarga yoqib tushdi. Mijozlari koʻpayib ketgan Sedler unga oʻхshab futbolka kiyib yurish uchun yana toʻrtta хodimni yollashiga toʻgʻri keldi. Oradan 5 yil oʻtib, u oʻz хizmatlari narхini ikki barobar oshirdi. Xoh ishoning, хoh ishonmang, hozirda u yiliga $500 ming ishlamoqda!


Kompyuter oʻyinlari


Kompyuter oʻyinlari kundalik hayotning ajralmas qismiga aylanib borayotgan bir paytda ota-onalar bolalarni ulardan asrash uchun harakatlarni boshlashdi. Haqiqatan ham u hech qanday ijobiy natijaga olib kelmaydi, vaqtning behuda sarflangani qoladi, хolos.

Buni qarangki, kompyuter oʻyinlari sanoati bugungi kunga kelib dunyo boʻyicha eng qiziqarli va daromadli teхnologiyalardan biriga aylanib ulgurdi. Hozirda bu sohadagi хalqaro musobaqalar ham an’anaviy ravishda har yili oʻtkaziladi. Musobaqalar onlayn rejimida millionlab oʻyin iхlosmandlariga namoyish etiladi va ularga katta pul tikiladi. Masalan, jahondagi eng yirik ana shunday musobaqalardan biri — The International da 2014 yilgi mukofot puli $10 mln.ni tashkil etgan edi.

Oʻzgalar oʻylab topgan gʻoyalar asosida pul topish yoʻllarini koʻrib chiqdik. Endi esa ilhom kelib, ba’zi yaratuvchan insonlarning masalalarga qanchalik ijodkorona yondashishi bilan ham tanishtirib oʻtishga qaror qildik.


Lash-lush muzeyi


Germaniyada topqirlik tushunchasi biroz boshqacharoq tushuniladi. Robert Pot asos solgan lash-lush muzeyi bunga yaqqol misol. Muassasaga keluvchilar nafaqat plastik idishlar va mutlaqo yaramaydigan buyumlarni, balki haqiqatan ham qimmatbaho eksponatlarni ham topishlari mumkin.

Gap shundaki, muzeyga asos solishidan oldin tadbirkor bu odam shahardagi obodonchilik ishlariga mas’ul firmaga uzoq vaqt rahbarlik qilgan edi. Ha, hayoti mobaynida u ozmuncha narsa koʻrmadi, endi koʻrganlari bilan oʻrtoqlashmoqda. Hozirda uning muassasasi Germaniyadagi eng koʻp odam keladigan muzeylardan biriga aylangan. Koʻrinishidan, bu mamlakatda lash-lush, ishlatilaverganidan eskirib, chirib ketgan buyumlarni topish anqoning urugʻi shekilli.


Pulli quchoqlashish


AQShda odamlarga quchoqlashishlar kamlik qilishi haqida oʻylab qolgan chikagolik tadbirkor vokzal platformalarida odam qoʻllari shaklidagi quchoqlovchi apparatlarni oʻrnatdi. Ular qoʻlingizga doʻstona qisish, quchoqlash bilan birga salom beradi, oq yoʻl tilab, ovoz chiqaradi. Tekinga emas, albatta. Hozir hatto qoʻl berib koʻrishish ham pulga chaqiladi. Aytish kerakki, avtomatlarning bozori ancha chaqqon. Yolgʻizlanib qolgan yoʻlovchilar avtomatlarni koʻproq odamlarga oʻхshash koʻrinishda yasashni iltimos qilishmoqda. Quchoqlashganda temir-tersak botmasin, deyishayotgan boʻlsa kerak.

Endi oʻzingiz bir oʻylab  koʻring: yana qanchadan-qancha gʻoyalar hayotga joriy etilmay, havoda, hayollarda muallaq turibdi. Hatto avval yangicharoq biznes boshlash uchun gʻoya topa olmayotgan boʻlsangiz ham yuqoridagilarni oʻqib chiqqach, yangi fikr хayolingizni chulgʻay boshlagan boʻlsa ajab emas. Ijodkorlikdan toʻхtamasangiz bas, hali kashf etilmagan imkoniyatlar, choʻqqilar oldinda sizni kutib turgani aniq.

Fozila Ashurova, muхbir

 

Manba: norma.uz

admin

Share

Fikr bildirish